"BAY GAN", YON JÈS FANM ANSENT YO RAYI : POU KI REZON MEDSEN YO FÈ L ?

Pandan yon peryòd gwosès, gen yon seri prekosyon ak egzamen ki esansyèl pou yon fanm fè. Nan anpil peyi, medsen oswa fanmchay yo konn bay medam ansent yo gan. Pratik sa a fèt sitou nan moman akouchman yo, malgre anpil fanm pa renmen jès sa a ditou. Men, OMS ki se Òganizasyon Mondyal Lasante dekouraje pwofesyonèl sante yo fè jès sa a souvan.

Kredi Imaj : Bing AI

"Bay Gan" se jès sa a ki rele "Touche vajinal" la nan langaj medikal la. Se yon jès anpil fanm pa apresye, paske yo pa santi yo konfòtab. Pafwa, yo konn santi pwofesyonèl sante yo bay yo gan twòp e sitou se yon jès yo manke konprann. Men, ki itilite pratik sa a ?

{getToc} $title={KONTNI ATIK LA} $count={Boolean}

Kisa "Touche Vajinal" la ye ?

Touche vajinal la se yon egzamen kote medsen oubyen fanmchay la rantre 2 dwèt li (aprè li fin mete gan) nan vajen yon fanm pou l ka analize kèk ògàn tankou vajen an, kòl matris la, matris la, ovè yo, vesi a, elatriye... Sa fèt pandan yon egzamen jinekolojik oubyen lakay yon fanm ansent.

Ki itilite "Bay gan" an kay fanm ansent ?

Jès sa a fèt pou plizyè rezon e l pa fèt kay fanm ansent sèlman. Pou fanm ansent yo, pwofesyonèl sante yo konn fè l pi souvan pou yo kapab:

- Konfime gwosès la epi verifye si gwosès la p ap devlope nan yon move pozisyon, tankou deyò matris la. Men aktyèlman, genyen lòt metòd ki plis efikas pou fè sa yo;

- Dyagnostike si fanm lan pa genyen menas pou l akouche avan lè ("Menas akouchman prematire"), ki se yon sitiyasyon kote matris fanm lan genyen kontraksyon epi kòl matris la ap ouvri tou, avan gwosès la genyen 37 semèn.

- Egzamine basen fanm lan : sou 8 mwa gwosès, touche vajinal la pèmèt medsen an evalye dimansyon ak eta basen fanm lan. Anplis, li kapab konpare l ak dimansyon tèt tibebe a yon fason pou l detèmine ki prekosyon ki dwe pran pou suivi gwosès la;

Pandan peryòd gwosès la, pwofesyonèl sante a ka bay fi a gan sitou pou l kapab analize kòl matris la : Konsistans li, longè li, ouvèti li ak pozisyon l. Se yon jès ki gen yon gwo enpòtans tou nan moman akouchman an, li pèmèt pèsonèl sante a verifye pozisyon tèt bebe a.

OMS ak kèk lòt enstitisyon tankou HAS, nan rekòmandasyon yo pou suivi gwosès yo, pa rekòmande pou bay medam ansent yo gan sitou si gwosès la ap byen evolye. Men, nan moman akouchman an, si yon pwofesyonèl ap fè touche vajinal pou yon fanm, li pa dwe fè l dri, li dwe kite yon entèval 4 èdtan pou pi piti pase. Epitou, zafè bay gan an pa obligatwa, dayè gen anpil lòt metòd ak materyèl ki bay pi bon rezilta.

Poukisa medam yo pa renmen l ?

Anpil fwa medam yo plenyen pou kesyon touche vajinal la pou anpil rezon. Pami yo :

• Enkonfò fizik;
• Doulè;
• Egzamen an antre nan entimite yo;
• Pwoblèm konsantman;
• Move temwanyaj, elatriye.

Kèk konsèy enpòtan

Parapò ak fason pratik sa a kreye anpil plenyen nan kominote a, men kèk ti konsèy ki ap ede sitiyasyon an pi byen jere.

Pwofesyonèl sante yo dwe :

• Enfòme pasyan an sou jès la pou l bay konsantman li. Dayè nan peyi Lafrans, si yon medsen bay yon fanm gan san konsantman li, zak sa konsidere kòm yon vyòl;
• Respekte tout prensip lijyèn yo;
• Genyen yon espas ki apwopriye, e jere entimite pasyan an;
• Rann pasyan an alèz epi kreye yon klima konfyans ; elatriye.

Pasyan yo tou dwe fè yon efò bò kote pa yo, yo dwe tande medsen yo byen epi retire tout prejije ki fè yo toujou vle refize pratik la san yo pa konprann li byen.

Kidonk, li nesesè pou jès sa a fèt nan yon espas ki apwopriye, sou konsantman pasyan an epi avèk bon jan esplikasyon sou sa. Malgre enpòtans li, genyen prekosyon ki dwe pran paske pratik sa a gen yon seri risk pou l lakoz enfeksyon, fè fanm lan senyen, elatriye. Sa ki enpòtan, jès sa a pa obligatwa, men tou, li ka fèt depi tout kondisyon yo reyini.

__________________

Ou se yon Tizè Konesans ?
Ebyen, se kiryozite w wi ki bouste nou!