5 SEKRÈ POU W BOUSTE KONFYANS NAN TÈT OU

 Konfyans nan tèt ou se motè k ap pèmèt ou genyen ase fòs pou kouri epi atenn objektif ou yo. Kidonk, lè yon moun manke konfyans nan tèt li, sa genyen enpak dirèk sou devlopman pèsonèl ak pwofesyonèl li. Puiske moun nan pa kwè nan kapasite li yo, sa fè li pa gen okenn lide pou avanse pou pi devan oswa pran nouvo defi. Moun sa a pèdi anpil opòtinite san rann kont.

Kredi Imaj : Bing AI

- "Mezanmi, ou kwè m ap ka fè l ?"

- "Èske sa m pral di a bon ?"

- "Adjeee! Jan mwen timid ! Pito nou bay yon lòt moun anime…" Sa yo se yon seri panse ak pwopo ki limite anpil moun nan kad devlopman pwofesyonèl ak pèsonèl yo.

Anpil fwa, ou "echwe san eseye", jis paske ou pè kòmanse yon bagay. Otomatikman yon moun pa gen konfyans nan tèt li, l ap gen gwo pwoblèm pou reyalize objektif li. Epi, li souvan gen yon opinyon negatif nan tèt li sou sa l dwe reyalize nan lavi li. Manke konfyans se youn nan pi gwo pwoblèm anpil moun ap konfwonte, sa konn fè yo pa janm wè vrè kapasite ak talan yo genyen. Poutan, premye sekrè pou w reyisi se konfyans pou w gen nan tèt ou !

Konfyans nan tèt ou vle di kwè nan tèt ou, nan konpetans ou, potansyèl ou ak kapasite ou. Li pèmèt ou avanse, pran nouvo defi, elatriye.

Konfyans nan tèt ou se yon pèsepsyon ou genyen nan tèt ou, ki pèmèt ou jere sitiyasyon chak jou yo, fè chwa, reyaji ak adapte w. Eksperyans chak jou yo ka ede ou ranfòse li oswa ka gen yon enfliyans negatif sou li tou.

{getToc} $title={KONTNI ATIK LA} $count={Boolean}

Kisa ki ka fè yon moun pèdi konfyans nan tèt li ?

Gen anpil rezon ki kapab fè konfyans yon moun te genyen nan tèt li bese. Pami yo :

• Edikasyon moun lan resevwa;
• Yon twomatis ki kite move souvni nan tèt moun lan;
• Yon seri kritik moun lan resevwa : se sa ki fè li enpòtan anpil lè n ap pote kritik sou travay yon moun pou n pridan nan sa n ap di yo, yon fason pou n pa fè l plis mal;
• Lè moun lan pè pou l pa echwe, elatriye.

Kijan yon moun ki pa kwè nan tèt li ap santi l ?

Sitiyasyon sa a kapab manifeste sou divès fason, pami yo, moun lan kapab :

• Genyen yon santiman enferyorite ak kilpabilite;
• Pè kritik ak jijman;
• Gen laperèz pou gade lòt moun;
• Doute de tèt li;
• Nan enkapasite pou defann tèt li;
• Timid;
• Pè echèk;
• Nan laperèz pou pran yon desizyon, elatriye.

Yon moun ki manke konfyans nan tèt li se yon moun ki toujou ap denigre tèt li, devalorize tèt li, gen difikilte sosyal paske mank konfyans li an trè remakab. Li difisil pou moun sa yo pran yon desizyon paske yo pa vle ale nan sans opoze ak lòt moun. Lè yon moun manke konfyans nan tèt li, sa kapab enpakte anpil aspè nan devlopman pèsonèl ak pwofesyonèl li.

Nou envite w al li atik sa a : 

ZAFÈ SANTE MANTAL AN AYITI: KILÈ OU DWE ALE WÈ YON SIKOLÒG ?

5 teknik pou w ka ogmante konfyans nan tèt ou

Men kèk etap ki kapab ede ou ogmante konfyans nan tèt ou :

     1- Idantifye panse negatif ou yo epi transfòme yo an pozitif

”Mwen pa ka fè sa”,”Mwen pral echwe",

Depi se fòm panse sa yo ou gen nan tèt ou lè w pral fè yon bagay, ou dwe konnen panse sa yo reprezante gwo danje pou avni w. Lè w rekonèt panse negatif sa yo, fè anpil efò pou w chanje yo ak panse pozitif, tankou : “ Mwen pral eseye epi kontinye jiskaske mwen ka fè l byen”.

Eseye panse konsa chak jou epi pran abitid repete fòm pawòl sa yo.

     2- Rekonèt kapasite w epi admèt potansyèl ou

Sa mande pou w sispann rabese w nan konpare tèt ou ak lòt moun, sispann fè dout sou tèt ou, paske chak moun gen talan pa yo se ou menm ki pou idantifye ak devlope pa w yo.

Aprann analize sa w te fè deja ki bon epi reflechi sou kalite konpetans ou te montre ladan yo. Konnen byen, chak bagay ou rive fè konsidere tankou yon viktwa, chak akonplisman, chak objektif oubyen chak pwojè ou reyalize ap fè konfyans ou gen nan tèt ou ogmante.

    3- Travay sou devlòpman pèsonèl ou

Sa vle di mennen aktivite ak pratik ki kapab ede ou fòme tèt ou, tankou :

• Fè lekti ak rechèch sou sijè ki entèrese ou yo;
• Patisipe nan fòmasyon ak pwogram nan domèn ou vle pwogreseyo;
• Chèche akonpayman yon moun ki gen plis eksperyans, sa ap ede ou travèse defi yo.

     4- Bati yon antouraj ki pozitif pandan w ap pataje sa w konnen ak lòt moun

Yon fason pou w kapab toujou gen yon panse pozitif, rete lwen tout moun ki gen panse negatif. Antoure w ak moun ki kapab ankouraje w epi ki enpòtan nan lavi w : li kapab zanmi oubyen fanmi w.

Yon moun ka fè w mal si l ap denigre moun bò kote w, si li pa janm kite opinyon w pase tou. Kidonk, pran tan w pou fè yon ti reflechi pou w panse ak tout moun ki fè w byen. Ou dwe pase plis tan ak moun ki apiye w, enspire w epi ki ka fè w santi w pi byen. Lè w antoure avèk moun ki soutni w epi ki prè pou koute w, li ogmante konfyans nan tèt ou.

Youn nan metòd k ap ede w bati antouraj ki pozitif, se lè ou patisipe nan gwoupman sosyal kote w ap kapab pataje lide ak eksperyans ou yo ak moun ki gen menm enterè ak vizyon avèk ou.

     5- Teste limit ou

Pa pè pran risk epi pataje lide ou yo ak moun k ap respekte yo. Sa ka ede w ogmante kouraj ou ak konfyans nan tèt ou. Li posib pou sa pran tan, men lè w kòmanse pran etap sa yo, ou ka ogmante konfyans nan tèt ou epi w ap kapab sipòte ak reyalize objektif ou yo ak plis efikasite.

Kidonk, yon moun ki gen konfyans nan tèt li, souvan gen yon opinyon ki pozitif nan tèt li, moun sa ka pran risk pou reyalize objektif li.

Tout teknik sa yo, kapab ede yon moun reprann li tipa tipa. Men tou, yon moun ki santi l manke konfyans nan tèt li kapab rejwenn yon sikològ. Konsa, pwofesyonèl sila va akonpanye l nan pwosesis pou rejwenn konfyans nan tèt li selon metòd ak egzijans domèn lan.

Redaksyon

Ludje Jean

Etidyan finisan nan Sikoloji

__________________

Ou se yon Tizè Konesans ?
Ebyen, se kiryozite w wi ki bouste nou!