PWOKRASTINASYON : YON MOVE PRATIK KI KA LAKOZ ECHÈK

 « Si m pa gentan fè l pita, m a fè l demen », « Si m pa gentan fè devwa a demen maten, m ap fè l anvan pwofesè a rantre »… Depi w repete youn nan fraz sa yo deja, depi w nan repouse sa w dwe fè nan yon jou pou demen san yon rezon valab epi w pa janm ka kenbe pwomès yo, konnen w kontamine ak yon pwazon vyolan ki pa sispann trape moun sou latè beni ki rele PWOKRASTINASYON. Depi w pran gou nan kite pou demen sa w dwe fè jodi a, ou se yon Pwokrastinatè. Sa ka antrave relasyon w ak moun ki nan antouraj ou yo e sa ka detui vi pwofesyonèl ou.

Kredi Imaj : Bing AI

Kiyès nan nou ki pako janm fè parese lè nou gen yon bagay enpòtan pou nou regle nan yon jou epi nou kite l pou pita oubyen demen? Anpil fwa rezon ki lakoz nou fè sa yo konn devwale yon mank disiplin ak prensip nan fason nou òganize travay nou gen pou nou fè yo. Tandans sa a ki toupatou e ki gen anpil enpak sou vi moun nan sosyete a rele Pwokrastinasyon. Kisa ki lakoz li ? kijan yon moun kapab kouri dèyè l ?

{getToc} $title={KONTNI ATIK LA} $count={Boolean}

Konprann kisa ki Pwokrastinasyon

Pwokrastinasyon se yon tandans oubyen yon defo yon moun genyen pou l ranvwaye pou yon lòt lè yon travay enpòtan li gen pou l fè. Anpil fwa, li ka pa p regle anyen ki pi serye nan tan sa a. Nan bon kreyòl, nou kapab rele yon moun k ap plede pwokrastine: parese, ransè oubyen bolozè.

Pa egzanp, yon moun ka gen yon rapò travay pou l prepare epi l chita ap gade fim oubyen bay blag ak zanmi. Anpil etidyan ak elèv lekòl konnen fenomèn sa a, lè yo gen yon devwa pou yo kòmanse depi kèk semèn, men, yo prefere ap pèdi tan nan lòt aktivite ki san enpòtans. Genyen etidyan ki konn menm di pwofesè yo te mèt bay yon devwa pou yon lane y ap kòmanse l lavèy jou y ap remèt li a. Anpil fwa, travay sa yo konn pa menm fini, oubyen mal fèt tou. Sa montre nou nan ki nivo pwokrastinasyon an ap ravaje epi detui nou.

Atansyon ! Retade yon aktivite enpòtan pa vle di otomatikman pwokrastine si w fè l nan objektif pou w genyen plis tan pou w byen prepare l. Anplis, gen anpil opinyon ki fè konprann pwokrastinasyon an pa toujou yon move abitid paske pafwa li pèmèt ou diminye chay mantal ak tansyon ki lakay ou. Zafè pwokrastinasyon sa a tèlman rive lwen, 25 Mas konsakre kòm jounen mondyal Pwokrastinasyon nan tout peyi nan mond lan.

Men kisa moun k ap pwokrastine yo fè

Pwokrastinasyon an pa t janm yon bagay senp. Se yon pyèj li ye, e se kan w pran w konnen. Men kèk etap depi w santi w ap franchi yo, konnen w deja kontamine:

1. Ou gen yon travay pou w fè, men souvan ou pa apresye tach sa oubyen ou twouve l twò difisil, ou pa santi w konfòtab pou w fè l nan moman an ou voye l pou pita oubyen demen.
2. Lè demen rive, ou fè menm jan an oubyen yon lòt bagay ki souvan nesesè vini san w pa t atann . Sa lakoz ou repòte premye travay sa a pirèd;
3. Epi plizyè fwa ou fè l konsa, yon semèn gendwa pase ou pa rive fè sa w te gen pou w te fè a.
4. Aprè yon tan, ou vin santi w koupab, ou ka menm rive sèmante pou sa pa fèt ankò;
5. Alafen, san w pa rann kont ou toujou kontinye konsa chak jou, jiskaske ou pa janm reyalize anyen serye.

Ki rezon ki konn lakoz yon moun pwokrastine?

Genyen anpil rezon ki kapab lakòz pwokrastinasyon. Men, pami eskiz anpil moun konn bay lè sa rive yo, nou kapab site :

• Mank tan ak twòp distraksyon nan antouraj nou;
• Anksyete;
• Yon moun ki manke kwè nan kapasite l;
• Pèfeksyonis;
• Annui;
• Pè echèk osinon siksè;
• Mank motivasyon;
• Difikilte pou w konsantre w epi fatig.

Genyen anpil deba ki fèt sou lide pwokrastinasyon ta konsidere tankou yon twoub sikolojik men, jiskaprezan poko gen antant sou sa. Sa nou dwe konnen tou anpil fwa se yon pwoblèm sikolojik ki lakòz yon moun pwokrastine li pa toujou yon parès volontè.

Ki moun ki kapab pwokrastine ?

Pwokrastinasyon se yon fenomèn ki gaye kò l nan tout kwen mond lan. Li ka rive nenpòt moun e, nan nenpòt domèn ki egziste. Kidonk, depi w ap kite travay enpòtan w pou al pran plezi nan sa ki pa twò serye ou se yon bolozè.

Daprè yon etid estatistik ki te fèt, syantifik yo estime 80 a 90% etidyan yo lage kò yo nan pwokrastinasyon, e se lakay gwoup moun sa yo ou plis jwenn atitid sa. Chak jou, yo pase pou pi piti 1 èdtan ap pwokrastine. Yon lòt etid pwouve anviwon 20% nan popilasyon oksidantal la afekte ak yon pwokrastinasyon kwonik.

Ki konsekans pwokrastinasyon an ?

Tout moun konn pwokrastine, men, lè sa fèt ak repetisyon sa ka gen gwo enpak sou lavi w ak sou relasyon w avèk antouraj ou. E jounen jodya, pwokrastinasyon an konsidere tankou yon dezekilib ki kapab lakoz :

- Fèblès nan pèfòmans entèlektyèl osinon pwofesyonèl ou;

- Diminisyon sou kalite byennèt ou;

- Diminisyon revni ekonomik ou;

- Rediksyon sou kalite travay ou, elatriye.

Pwokrastinasyn souvan asosye ak estrès, gwo laperèz epi depresyon ki egzajere... E si l vin kwonik epi pèsistan, li kapab genyen move enpak sou sante mantal ak fizik yon moun.

Kredi imaj : cbtclinic

Kèk Konsèy pou w evite pwokrastine ?

Si yon moun vle, li kapab diminye oubyen evite pwokrastine. Pou sa, men kèk konsèy byen senp nou kapab aplike nan vi nou :

• Chèche konnen ki rezon ki ka lakoz pwokrastinasyon an menm.
• Defini kisa ki priyorite w, sa ap ede w konnen egzakteman ki kote ou dwe kòmanse;
• Chèche epi konsantre w sou objektif ou yo;
• Bati yon bon kalandriye ki genyen lis tout travay ou genyen pou w fè pandan yon peryòd ki byen defini, ki kapab yon semèn oubyen yon mwa;
• Byen òganize plan travay ou;
• Evalye kantite tan w ap gen bezwen pou w akonpli yo, pandan w ap priyorize sa ki pi enpòtan yo.
• Rezève yon kantite tan espesyalman pou enprevi ak distraksyon yo;
• Kreye yon espas travay ki ekate w de tout sa ki kapab distrè w oubyen deranje moman travay ou;
• Kreye ti moman poz pandan w ap travay, sonje ou pa yon wobo, lespri w pa p ka konsantre nèt ale san ou pa pran kèk minit repo;
• Pran ti tan pou w panse ak travay ou gen pou w fè , ki valè ak enpòtans li genyen pou ou ? èske l ap itil antouraj ou ? èske l ape de lòt moun avanse. Paske santiman ou genyen lè w santi w ap rann ou iti l kapab yon sous motivasyon pou ou.
• Chèche motivasyon an lòt kote tou, swa nan antouraj imedya w oubyen kèk lòt moun ki enspire w ak sa yo akonpli.
• Avanse nan rit ou kapab, pa prese fè yon travay ki pa de bòn kalite, pran san w, pa mete twòp presyon sou tèt ou, pa konpare w ak lòt moun.

Nou chak, nan yon moman ki rive, konn pote ti neglijans nan travay yo lè nou pa remèt yo nan lè nou dwe fè sa. Men, si toutfwa ou remake sa vin tounen yon abitid lakay ou, e fòk lè a rive pou w kòmanse travay ou gen pou w fè yo, ou dwe chèche yon fason pou w aranje sa. Si w ta va remake ou poko amelyore jan ou ta vle a, pran ti pasyans, ou pa p ka chanje tout bagay yon sèl kou. E si tout fwa konsèy sa yo pata sifi, ou kapab toujou konsilte yon sikològ, pou ede w jwenn yon bon mwayen pou w jere tèt ou.

Redaksyon

Medjina N. Eliacin

Etidyan finisan nan Sikoloji

Chèf kwizin

Dekoratris evènman

CEO GRACE Hair Oil

__________________

Ou se yon Tizè Konesans ?
Ebyen, se kiryozite w wi ki bouste nou!