PIRAT YO KONTAN CHAK FWA W KONEKTE SOU YON WIFI PIBLIK !

Nan moman n ap viv la, anpil moun itilize WiFi piblik yo pou yo kapab konekte sou entènèt. Non sèlman paske yo gratis, men tou, paske yo disponib nan prèske tout espas piblik yo, nan lekòl yo, nan otèl yo, nan ba yo, e menm nan legliz yo tou. Se vre rezo WiFi piblik yo itil, men èske w te konnen chak ou konekte sou youn, pirat yo kontan anpil ?

Kredi imaj: Bing AI

Yon wifi piblik se yon pwen aksè entènèt san kòd ki disponib nan yon espas piblik pou pèmèt moun k ap frekante espas sa a kapab konekte epi navige sou Web la, telechaje ak transfere fichye, itilize rezo sosyal yo gratis, elatriye. Men èske w te konnen gen gwo danje ki plane sou chak grenn aparèy ki konekte yo ?

{getToc} $title={KONTNI ATIK LA} $count={Boolean}

Ki danje ki gen nan konekte sou WiFi piblik?

Lè w konekte sou yon rezo WiFi piblik, nenpòt moun ki gen konesans pou sa (Pirat), ki konekte sou menm WiFi sa a, kapab kontwole yon seri aktivite w ap regle sou aparèy ou yo (tankou sit entènèt ou vizite yo). Yo ka menm rive mete men sou done sansib ou yo tankou modpas, enfòmasyon bankè w, elatriye.

Ki sa pirat yo fè menm?

• Youn nan metòd pirat yo souvan itilize pou vòlò done moun, yo ale nan yon enstitisyon anpil moun souvan frekante, yo kreye yon fo rezo WiFi ki gen menm non ak enstitisyon sa a. Yo pa mete kòd sou WiFi sa a, kidonk nenpòt moun ap fè l konfyans epi yo konekte sou li byen rapid. Ebyen, otomatikman w konekte sou WiFi sa a, pirat yo kapab gen aksè epi vòlò yon seri done sou aparèy ou a.

• Yon lòt metòd yo souvan itilize ankò rele "man-in-the-middle". Nan metòd sa a, yon moun ki bò kote w kapab ouvri yon WiFi san kòd pou telefòn ou an konekte, konsa tou ou kapab nan nesesite yon ti koneksyon entènèt epi w mande moun nan WiFi. Lè w fin konekte, si moun sa a vle pirate aparèy ou a, li kapab entèsepte (pran) tout done k ap pataje ant ou menm ak tout sit Web w ap vizite yo. Sa ap pèmèt li gen aksè ak yon pakèt enfòmasyon pèsonèl ou.

• Konsa tou, lè w konekte nan yon WiFi piblik san kòd, pirat la kapab lage yon viris nan aparèy ou a pou domaje l oubyen li kapab lage yon lojisyèl malveyan pou vòlè done w gen sou li yo. Anpil fwa, lè yo fin pran done sa yo, yo konn mande viktim yo gwo sòm lajan pou l rekipere yo.

Nou envite w al li atik sa a :"YO PIRATE W SOU ENTÈNÈT LA EPI YO MANDE W LAJAN: KÒMAN POU W REYAJI? "

Kredi Imaj : Norton

Kòman w kapab pwoteje tèt ou?

Pi bon fason w ka itilize pou w pwoteje tèt ou kont atak pirat yo ka fè sou ou nan itilize wifi piblik yo se evite yo. Men, toutfwa w anvi itilize yo, men kèk ti prensip pou w suiv:

• Byen verifye non rezo a, epi si lè w fin konekte yo voye w sou yon paj wèb pou w antre enfòmasyon pèsonèl ou, dekonekte tousuit! (Li posib pou w jwenn rezo wifi k ap mande w enfòmasyon sa yo nan lekòl yo, si enfòmasyon y ap mande w yo, ou remake yo pa twò konsène lekòl la vre, lage pye w rapid !);
• Mete bon antiviris sou aparèy ou yo, l ap eskane epi efase tout sa ki sanble danje pou aparèy ou an;
• Itilize VPN, l ap pèmèt ou navige plis an sekirite epi l ap kripte done k ap echanje ant ou menm ak sit wèb yo. Kidonk, menmsi yon pirat ta entèsepte yo, li pa p ka konprann yo oubyen l ap pran anpil tan avan li rive dekripte yo;
• Toujou fè mizajou nan aparèy ak lojisyèl w ap itilize yo pou w ka toujou gen dènye vèsyon sekirite yo;
• Dezaktive posibilite aparèy ou yo genyen pou yo konekte nan WiFi otomatikman;
• Lè w pa p itilize yon WiFi piblik ankò, dezaktive WiFi w;
• Pa janm fè pèman anliy (Pèman ak kat kredi, kat debi, Paypal, elatriye) nan WiFi piblik.

Menm si rezo WiFi yo konn trè itil, yo abitye reprezante gwo danje pou done nou yo, men si w pran prekosyon ki nesesè yo w ap kapab pwoteje done ou yo epi navige sou entènèt san pwoblèm menm si w ta nan yon WiFi piblik san kòd.

Redaksyon

Christerlin Joseph

Etidyan Nan Syans Enfòmatik

__________________

Ou se yon Tizè Konesans ?
Ebyen, se kiryozite w wi ki bouste nou!