Mizik gen yon plas espesyal nan yon sosyete paske li se yon fason pou moun yo afiche kilti yo. Li se yon bon mwayen pou chak gwoup moun kominike emosyon yo, e se yon lyen ki fè linyon ant tout kouch moun nan yon kominote. Mizik jwe toupatou sou latè, se sa k fè konsomatè yo pa janm sispann ogmante. Anplis, mizik se yon sektè ki fè anpil lajan sikile. Tankou, selon "Statista", pou lane 2018 la, sektè mizik la te gen yon chifdafè mondyal ki te evalye ak 53,77 milya dola ameriken.
Teknoloji a ki ap pwogrese chak jou, pote anpil touch espesyal nan domèn lan, sitou ak zafè entèlijans atifisyèl yo ki antre nan tout aspè pwodiksyon mizikal la. Malgre, pou anpil moun sa parèt tankou yon menas pou avni pwofesyonèl ki nan sektè a.
 |
| Kredi Imaj : Bing AI |
Itilizasyon zouti Entèlijans atifisyèl yo vin popilè nan prèske tout domèn ki lye ak nimerik la, soti nan ekri atik pou blòg, pase nan grafik dizay, pase nan montaj videyo, pase nan kreye imaj, ale byen lwen toujou. Kounyeya, ou ka ap mande tèt ou : " Kisa ki entèlijans atifisyèl la? ".
Nan yon fason ki byen senp, Entèlijans atifisyèl la se yon ansanm teknik ak teyori enfòmatik ki pèmèt lèzòm kreye epi mete nan yon machin (òdinatè, esmatfòn, gadjè elektwonik) yon kapasite pou l imite entèlijans moun. Pa egzanp, kapasite pou rekonèt vwa yon moun, kapasite pou rekonèt vizaj yon moun, abitid ak preferans yon moun, elatriye.
Gras ak kapasite sa a, òdinatè yo vin ka reyalize yon seri travay ak yon egzaktitid ki ka menm depase nivo lèzòm. E pou sektè mizik la menm ?
{getToc} $title={KONTNI ATIK LA} $count={Boolean}
Entegrasyon entèlijans atifisyèl yo nan mond mizikal la
Anpil moun gendwa pa t janm panse ak sa. Men, entèlijans atifisyèl yo gen plizyè boukèt lane depi y ap frape fò nan endistri mizikal la nan yon echèl mondyal. Epi, gras ak dènye avanse teknoloji yo, anpil nan zouti entèlijans atifisyèl sa yo vin pi pèfòman toujou.
Si n ap fè listwa, depi nan lane 1950 yo, nan peyi Lèzetazini, Harry Olson ak Hebart Belar ki se 2 enjenyè ki t ap travay nan yon antrepriz elektwonik ki rele RCA, te rive fabrike yon aparèy, (yon òdinatè) pou pwodui mizik poukont li, san yon mizisyen pa t oblije jwe mizik sa a avan.
Aparèy sa a ki te rele RCA Mark II Sound Synthesizer te gen yon klavye ki te la pou pèmèt moun nan antre nòt yon mizik ki ekri nan yon patisyon epi aparèy sa a ap pwodui mizik la apati de nòt sa yo. Kidonk, materyèl sa a te itilize entèlijans atifisyèl pou l jwe mizik ki ekri sou patisyon yo. E, li te pèmèt chantè nan epòk yo diminye nan depans yo t ap fè pou peye tout yon òkès pou fè enstrimantal mizik yo pou yo.
 |
| RCA Mark II Sound Synthesizer |
Premye moso mizik ki te kreye gras ak yon etèlijans atifisyèl te fèt nan lane 1956. Se 2 Chèchè ki te rele Lejaren Hiller ak Leonard Isaacson ki te fè l gras ak yon odinatè ki te rele ILLIAC I. Tit mizik sa a se te "Suite Illiac".
Ane aprè ane, pwosesis pou kreye mizik gras ak òdinatè yo vin pi fasil toujou gras ak yon seri lojisyèl tankou Fl Studio, Logic Pro, Bandlab, elatriye. Epitou, kategori lojisyèl pou fè mizik sou òdinatè sa yo ame jiskodan ak fonksyonalite ki lye ak entèlijans atifisyèl.
Èske entèlijans atifisyèl yo ka jwe mizik poukont yo?
Malgre devlopman anpil gwo lojisyèl pou sektè pwodiksyon mizikal la, yon moun te toujou bezwen yon minimòm konesans nan mizik (sòlfèj, amonizasyon, aranjman, ...) pou l te ka rive pwodui yon zèv mizikal.
Men, apati fen lane 2022 a, pa rapò ak gwo poteboure zouti entèlijans atifisyèl yo fè sou gran piblik la, plizyè antrepriz travay epi mete deyò yon seri gwo tonton zouti ki reponn ak anpil demann ki te konn genyen nan monn mizikal la.
Pami demann zouti entèlijans atifisyèl sa yo reponn yo, n ap jwenn :
- Kounyeya, gras ak yon kòmann sou fòma tèks, ou ka mande yon zouti entèlijans atifisyèl kreye enstrimantal pou ou;
- Apati yon kòmann sou fòma tèks, yon zouti entèlijans atifisyèl ka ekri yon mizik pou ou;
- Gen zouti entèlijans atifisyèl ki pèmèt ou kopye oubyen imite vwa lòt atis ;
- Gen zouti entèlijans atifisyèl ki ka pèmèt ou retire bri nan yon son ou te anrejistre;
- Gen zouti ki ka pèmèt ou fè rechèch yon mizik ak yon senp fredònman w fè oubyen si w jwe yon pati nan mizik la ba li;
- Gen zouti ki ka pèmèt ou dekouvri chak grenn enstriman ki jwe nan yon enstrimantal;
- Gen zouti tou ki ka pèmèt ou separe vwa a ak enstrimantal la nan yon mizik.
San konte yon bann ak yon pakèt lòt bèl fonksyonalite toujou.
Entèlijans Atifisyèl yo te manke chavire endistri a
Youn nan ka ki te fè plis eko e ki t ap al boulvèse monn mizikal la se lè yon jèn kreyatè kontni sou Tiktok ki gen pou non itilizatè "Ghostwriter997" te deside itilize entèlijans atifisyèl pou l imite vwa 2 gwo atis ki se Drake ak The Weeknd epi mete yo nan yon mizik.
Mizik sa a te rele Heart On My Sleeve. Li te soti nan mwa avril 2023 a. Li te depase 10 milyon ekout nan mwens pase yon semèn e li te vin viral sou Tiktok. Men, tousuit, mizik sa a t ap al efase sou tout platfòm anliy yo paske l te vyole lwa ki jere zafè dwadotè atis yo.
Kèk zouti ki itilize entèlijans atifisyèl pou kreye mizik
Kounyeya, gras ak entèlijans atifisyèl yo, anpil travay ki te egzije plis mizisyen, plis moun ak plis tan yo, vin senplifye. Lavi a parèt pi senp epi travay yo fèt pi vit. Gen plizyè lojisyèl ak platfòm anliy ki ka ede w nan pwosesis kreyasyon mizikal yo. Pami yo, nou ka site:
- Moises : aplikasyon sa a fèt pou moun ki abitye entèprete, entèpole oubyen fè remix mizik lòt atis. Ak yon sèl klik ou gen aksè separe vwa a ak chak grenn enstriman ki nan mizik la nan yon bat je. Aplikasyon sa a bay posiblite tou pou chanje gam epi monte ak desann tenmpo nenpòt mizik la pou mete l nan nivo ou alèz ladan l lan. Li gratis men sèlman w ap bezwen kreye yon kont sou li pou w itilize l. Kidonk, pa p gen grate tèt ankò pou w jwenn akò oubyen nòt chak grenn enstriman yo jwe nan yon mizik, ni pou w jwenn nan ki gam mizik la ye.
- MusicLM : Se yon zouti ki baze sou entèlijans atifisyèl, Google devlope l pou pèmèt ou jenere bon jan kalite mizik gras ak yon kòmann ou ba li nan yon ti bout tèks ki gen tout enstriksyon yo. Tankou:
- Si mizik la ap yon : djaz, pòp, tekno, elektwo, hip-hop, konpa, elatriye...
- Tip enstriman ou vle yo : gita, pyano, flit, viyolon...
- Epòk mizik la: epòk avan Jezi-Kri, ane 80, ane 2000...
- Nivo konpleksite mizik la: debitan, entèmedyè, mizisyen pwofesyonèl, elatriye.
- Beatoven: Se youn nan platfòm pou jenere mizik ak entèlijans atifisyèl ki pisan anpil. Zouti sa a pèmèt kreyatè kontni yo ka jenere mizik ki lib e ki san dwadotè apati yon seri kòmann.
- Mubert : se yon jeneratè mizik gras ak entèlijans atifisyèl ki konbine teknoloji ak kreyativite pou ofri w yon eksperyans inik nan zafè pwodiksyon mizikal la. Mubert kraze limit pwodiksyon mizik tradisyonèl yo. Tankou: ou pa oblije gen yon mizisyen pou chak enstriman, ou pa bezwen gen gwo konesans nan teyori mizik. Si ou se yon atis, Mubert ba ou posibilite pou pwofite teknoloji entèlijans atifisyèl yo nan kreye ak vann mizik.
Ak yon bann lòt ankò tankou : Soundraw, Boomy, Soundful, Aiva, Splash Pro, elatriye.
Èske entelijans atifisyèl yo pa menase sektè pwodiksyon mizikal la?
Entegrasyon entèlijans atifisyèl yo nan sektè pwodiksyon mizikal la, parèt klè tankou yon menas pou anpil mizisyen, pwodiktè, chantè ak tout lòt moun ki nan sektè mizik la. Men tou, revolisyon sa a pote anpil bèl bagay, li gen anpil avantaj li bay tou.
Anpil plenyen fèt nan lemonn, se pa sèlman nan sektè mizik la, sou menas entèlijans atifisyèl yo. Plizyè rezon esplike sa, men pou pwodiksyon mizikal la, sa ki plis repete yo se :
- Anpil travay ap disparèt nan sektè mizik la :
Gen yon seri travay (konpozisyon, vokal, miksaj, tèks, ) ki vin otomatik e pi senp nan pwodiksyon mizikal la. Sa lakoz yon diminisyon nan mendèv la. Sa ki otomatikman diminye kantite demann ki te konn genyen pou pwofesyonèl mizik yo. Rezilta dirèk la se chomaj, si moun sa yo pa t gen lòt debouche.
- Mizik yo ka manke emosyon :
Se vre entèlijans atifisyèl yo kapab jenere mizik la. Men, pafwa li ka manke emosyon ak estil yon vrè atis. E se sa ki fè, nan yon etid IFPI te reyalize nan lane 2023 a, li rive konprann konsomatè mizik yo kwè nan otantisite atis yo ki ap pèfòme reyèlman. 79% moun ki te patisipe nan etid sa a pa renmen mizik ki fèt ak entèlijans atifisyèl. Yo twouve yo manke jwi mizik la byen.
- Yon pwoblèm etik
Itilizasyon entèlijans atifisyèl yo pou imite oubyen repwodui stil ak vwa yon atis san konsantman l kapab soulve gwo kesyon etik. Sitou nan sa ki gen pou wè ak kreyativite epi dwadotè a tou. Nan menm etid IFPI a, 76% konsomatè yo montre li pa bon e pa dakò ak moun ki ap klone oubyen repwodui mizik atis yo san konsantman yo.
Se pa menas ki genyen sèlman, entèlijans atifisyèl yo louvri yon tèren pou bay bon jan avantaj tou. Pami yo, zouti sa yo pèmèt :
- Ogmantasyon kreyativite atis yo : Ede atis yo jwenn nouvo lide mizik, epi dekouvri lòt stil pou yo evolye
- Rann pwosesis pwodiksyon mizikal la vin pi rapid. Yon seri travay vin fèt nan yon bat je.
- Rediksyon kantite depans pwodiksyon mizikal la te ka mande. Yon mizik te ka mande entèvansyon anpil mizisyen ak lòt pwofesyonèl, poutan ak entèlijans atifisyèl yo, sa redui kantite moun lan ansanm ak kantite lajan ki ta dwe depanse. E sa rann sektè pwodiksyon an pi aksesib pou tout moun.
Entèlijans atifisyèl yo ap vin pi popilè nan endistri mizik la chak jou k pase, depi nan pwodiksyon an jouk rive nan konsomasyon mizik lan. Akote tout avantaj yo, gen anpil dega ki fèt tou. Kidonk, dwe genyen yon bon jan ekilib nan itilizasyon zouti sa yo, yon fason pou l pa fè plis mal pase byen.
Redaksyon
Dually Dagobert
Etidyan nan Syans Enfòmatik
__________________
Ou se yon Tizè Konesans ?
Ebyen, se kiryozite w wi ki bouste nou!
