Nan kuizin nou nan peyi Dayiti, menm jan ak anpil lòt kote nan lemonn, piman se yon epis ki itilize anpil. Men, sansasyon pike li bay la fè anpil moun poze kesyon sou li. Gen yon kategori moun ki menm rive di piman pa bon pou sante moun. Poutan, piman chaje ak byenfè, se lè nou pa kontwole kantite n ap konsome a, li ka lakoz gwo pwoblèm sante.
 |
| Kredi imaj : Bing AI |
Sa gen plis pase 9 mil lane depi lèzòm ap itilize piman nan kuizin yo. Se yon plant ki genyen plis pase 15 mil varyete nan lemonn. Men, genyen 5 ladan yo ki pi popilè, non syantifik yo se : Capsicum annuum, Capsicum baccatum, Capsicum chinense, Capsicum frutescen, Capsicum pubescens.
Piman chaje ak anpil vitamin tankou : A, B6, B3, C, E, elatriye. Li genyen anpil lòt eleman tou tankou : kuiv, fè, manyezyòm, potasyòm, elatriye. Anplis, li gen yon sibstans ki enpòtan ladan l anpil, li rele Kapsayisin, se li menm ki bay piman an gou pike a, san konte tout kalite byenfè li bay piman an.
Piman chaje ak anpil vitamin tankou : A, B6, B3, C, E, elatriye. Li genyen anpil lòt eleman tou tankou : kuiv, fè, manyezyòm, potasyòm, elatriye. Anplis, li gen yon sibstans ki enpòtan ladan l anpil, li rele Kapsayisin, se li menm ki bay piman an gou pike a, san konte tout kalite byenfè li bay piman an.
Aktyèlman, peyi End se pi gwo pwodiktè piman nan lemonn. Li pwodui plis pase 25% piman ki konsome sou latè.
{getToc} $title={KONTNI ATIK LA} $count={Boolean}
Èske piman bon pou moun manje ?
Piman se yon epis ki gen anpil byenfè sou kò nou. Men, li parèt yon gwo danje pou vi nou lè n pran abitid konsome l anpil.Pami byenfè piman an genyen yo :
- Li ede lite kont endijesyon ak balònman;
- Li diminye risk pou yon moun fè kansè nan kolon ak pwostat, gras ak sibstans li genyen ki rele Kapsayisin lan. Sibstans sa a fè pati yon gwoup sibstans ki rele alkaloyid ki ede nan prevansyon kansè.
- Li ede soulaje doulè nan kò nou;
- Li ede kont maladi kadyovaskilè yo : selon yon etid ki te fèt nan inivèsite De Cleveland ki te pibliye an novanm 2020. Moun ki konsome piman yo mwens mouri akoz maladi kadyovaskilè yo.
- Li ede boule grès. Yon seri chèchè ameriken te dekouvri kapsayisin lan ki nan piman an transfòme grès blanch nou gen nan kò nou yo ki lakoz nou pran pwa a, an yon lòt kategori grès ki itilize pou fabrike enèji pou kò a. E sa ede nou limite risk pou obezite.
Anplis tout sa yo, anpil eleman ki ladan bon pou : po nou, sistèm defans kò nou, zo nou, estimile apeti nou, diminye fatig, elatriye
 |
| Kredi imaj : rtbf |
Danje ki gen nan manje anpil piman
Lè yon moun konsome anpil piman, sa ka fè gwo dega sou eta sante l tankou :- Lakoz dyare ak vomisman;
- Li ka Diminye kapasite entèlektyèl moun sa a;
- Lestomak brile;
- Lakoz maladi Emowoyid;
- Li ka fè moun sa a santi dèyè l ap brile l lè l ap fè yon bezwen, ...
Èske tout moun ka konsome piman ?
Gen yon kategori moun ki dwe evite manje aliman ki genyen piman pike ladan yo, sitou :- Moun ki alèji ak piman;
- Moun ki gen ilsè lestoma, ak pwoblèm asid sou lestoma;
- Moun ki gen pwoblèm emowoyid;
- Timoun ki gen pi piti pase 2 lane, paske l ka ba yo gwo pwoblèm nan trip, elatriye.
Anplis de yon senp epis, piman se yon bon aliman pou sante nou ki chaje ak anpil vitamin ak lòt pwodui ki bon pou nou. Ann mete plis prensip nan fason n ap konsome l yon fason pou n benefisye byenfè li yo sèlman.
Redaksyon
Wilnadette Joseph
Etidyan Medsin
__________________
Ou se yon Tizè Konesans ?
Ebyen, se kiryozite w wi ki bouste nou!
