5 PI BON ETAP KI KA EDE W REYALIZE PWOJÈ W YO POU LANE 2024 LA

Nan fendane yo, sou chak 10 moun, gen 9 ki pa janm rive reyalize pwojè yo te fikse nan kòmansman lane yo. Sa se selon yon etid inivèsite “Scranton” nan Pennsilvani peyi Lèzetazini te fè ki montre 92% moun pa janm satisfè nan moman fendane yo.

Sa montre n se vre lane yo toujou kòmanse ak anpil motivasyon, men rezilta yo pa souvan satisfezan. Pa gen yon metòd fiks ki ka pèmèt yon moun reyalize tout sa l te vle yo. Men, gen anpil estrateji ki ap pèmèt ou byen jere ane a malgre tout kontrent ki ta ka prezante. Nan sans sa a, ki estrateji yo ye ?

Kredi Foto: La Woman Mag

"Ane sa a se ane pa m nan!" "Men ane chans mwen an!" "Ane sa a m pral fè siksè vle pa vle", sa yo se kèk pami yon seri fraz ki repete anpil pami gwo deklarasyon lajenès, pou n pa di anpil moun toujou ap fè chak lè yon ane tou nèf kòmanse.

Men, èske yo fè manti? An verite, yon kesyon konsa pa ko merite repons. Paske pou chak moun, pou chak sitiyasyon ki ta ka prezante, repons la ka varye. Men, malgre tout gwo deklarasyon, ve ak pwomès sa yo, li difisil anpil pou w wè anpil nan moun sa yo rive akonpli menm 20% nan sa yo te swete yo.

Kisa k lakoz sa? Kesyon sa a yon ti kras pi fasil pou nou ta reponn. Souvan, rezon ki kache dèyè mank akonplisman ve ak pwomès sa yo se : yon pwoblèm displin, prensip, mank mwayen (ekonomik, moun, anbisyon, tchalenj), dekourajman, pwokrastinasyon, elatriye...

Ane 2024 la apèn komanse, men 5 konsèy ki ka pèmèt ou reyisi ane sa a

1- Fikse objektif ou yo

Ou pa yon wobo, ou pa yon sipè ewo ni w pa gen bagèt majik nan men w. Pa panse w pral ka reyalize yon enfinite bagay pou ane a. Fikse w sou youn oubyen 2 gwo objektif olye pou w fikse 100 bagay. Non sèlman sa ap pèmèt ou rete fokis sou sa w vle reyalize a, konsa tou l ap pèmèt ou evite gaspiye enèji w nan kouri pasi pala san w pa reyalize anyen.

Raple w pawòl saa yon gwo motivatè ki rele John C. Maxwell te di : "Objektif yo bay lavi nou sans, yo pèmèt nou dirije enèji nou e bay chak grenn aksyon nou poze siyifikasyon".

2- Rann tèt ou fleksib

Monn lan pa janm sispann evolye. Konsa tou, antanke moun, ou oblije fleksib paske tout bagay pa p prezante jan w te imajine yo a. Si plan A pa mache, eseye AN, eseye B... Lesansyèl, ou dwe pare pou w eskive obstak ak sitiyasyon enprevizib yo epi transfòme yo an opòtinite.

3- Fè rezotaj

Yon moun se pwodui 5 moun li fwote ak yo plis la. Donk li enpòtan anpil pou w bati relasyon moun ak moun pou w grandi sèk pwofesyonèl ou yo. Premye bagay pou w kapte, pa al eseye chèche pou w nan bèl ekip men pito goumen pou w se yon bèl jwè. Konsa tout ekip ap vle genyen w, travay sou tèt ou, pèfeksyone w, bay pi bon vèsyon de ou chak jou. Antoure tèt ou ak moun ki gen menm foli ak ou, ki gen menm objektif ak ou e ki ka enspire w, moun ou ka mande konsèy, elatriye. Bati relasyon ak moun ou santi w ka pataje pwojè, defi ak pwogrè w yo...

Toujou sonje sa, opòtinite yo pa vini sèlman parapò ak konpetans ou, men yo vini parapò ak antouraj ou, koneksyon ou genyen ak lòt moun (Reid Hoffman, "The Start-Up of You").

4- Aprann nouvo bagay

Yon nouvèl ane se yon posibilite w genyen swa pou w pèfeksyone w nan domèn ou te deja ap evolye a oubyen pou w eksperimante nouvo bagay. Se yon chay nouvèl opòtinite w genyen pou w eksperimante nouvo orizon, pou w soti nan zòn konfò yo, epi pou w vann tèt ou

5- Pratike Gratitid

Pran tan w pou w apresye chak ti jefò w fè, felisite tèt ou pou chak etap ou franchi, selebre chak viktwa epi kontinye travay san kanpe pou w akonpli gwo tonton objektif ou te fikse yo. Chèche fè kè w kontan. Pa pè mande èd e w pa dwe konsidere mande èd la kòm yon siy feblès. Aprann konnen tèt ou, feblès ou yo epi pran swen tèt ou.

Si w mete 5 konsèy sa yo an pratik, si w bay tèt ou bon jan disiplin, w ap sezi wè kòman w ap fè enpak pandan ane a. W ap sezi dekouvri kantite moun ou enspire.

__________________

Ou se yon Tizè Konesans ?
Ebyen, se kiryozite w wi ki bouste nou!